ԲՐԻԿՍ-ի երկրների մասնաբաժինը համաշխարհային տնտեսության մեջ գնողունակության համարժեքության առումով գերազանցում է G7-ի մասնաբաժինը։ Այս մասին ասել է ՌԴ նախագահ Վլադիմիր Պուտինը Կազանում ԲՐԻԿՍ-ի գագաթնաժողովի ընդլայնված նիստում։
«ԲՐԻԿՍ-ի երկրների մասնաբաժինը գնողունակության հավասարության առումով 2024 թվականի վերջին կկազմի 36,7%, ինչը վստահորեն գերազանցում է Յոթնյակի երկրների մասնաբաժինը, որը կազմելու է շուրջ 30%»,- ասել է Պուտինը։
Ռուսաստանի ղեկավարը հայտարարել է, որ համաշխարհային առևտուրը և համաշխարհային տնտեսությունը զգալիորեն փոխվում են՝ ակտիվության կենտրոնները տեղափոխվում են դեպի զարգացող շուկաներ։
«Ձևավորվում է բազմաբևեռ մոդել, որն աճի նոր ալիք է բարձրացնում, առաջին հերթին գլոբալ հարավի և արևելքի, և, բնականաբար, ԲՐԻԿՍ-ի պետությունների հաշվին», – ասել է ՌԴ նախագահը։
Ռուսաստանն առաջարկել է ստեղծել ԲՐԻԿՍ-ի հացահատիկային բորսա՝ հետագայում լիարժեք ապրանքահումքային բորսայի վերածելու հնարավորությամբ։
ԲՐԻԿՍ-ի մի շարք պետություններ հացահատիկային մշակաբույսերի աշխարհի խոշորագույն արտադրողների շարքում են: Դա, ըստ ՌԴ նախագահի, կնպաստի, որ հացահատիկի բորսան ձևավորի պարենային ապրանքների արդար և կանխատեսելի ցուցանիշներ:
Պուտինի խոսքով` դա թույլ կտա նաև պաշտպանել միության անդամ երկրների ազգային շուկաները արտաքին անբարենպաստ միջամտությունից։
«Ժամանակի ընթացքում կարելի է մտածել հացահատիկի բորսան լիարժեք ապրանքային բորսայի վերածելու մասին»,- նշել է Պուտինը։
Ըստ նրա՝ դա առավել արդիական է, քանի որ ԲՐԻԿՍ անդամ երկրները էներգառեսուրսների շատ խոշոր արտադրողներ և սպառողներ են։
ՌԴ նախագահն ավելացրել է, որ նպատակահարմար է ստեղծել նաև թանկարժեք մետաղների առանձին հարթակներ, քանի որ այդ շուկան ունի տարբեր խոչընդոտներ:
