Ադրբեջանցիները կրակ են բացել Արցախի Հացի գյուղի դաշտում աշխատող քաղաքացու ուղղությամբ։ Այս մասին տեղեկանում ենք ԱՀ ներքին գործերի նախարարության (ԱՀ ՆԳՆ) ոստիկանության տարածած հաղորդագրությունից
«Նոյեմբերի 18-ին ժամը 12:15-ին Հացի գյուղի 43-ամյա բնակիչ Իգոր Աբրահամյանը ոստիկանության Մարտունու շրջանային բաժին է դիմել այն մասին, որ Հացի գյուղի վարչական տարածքի «Կաղնուն տակ» կոչվող տեղամասում «Բելառուս» մակնիշի տրակտորով գյուղատնտեսական աշխատանքներ իրականացնելիս, հարակից ադրբեջանական մարտական դիրքից հրաձգային զինատեսակներից կրակ է արձակվել իր ուղղությամբ»,-նշվում է հաղորդագրությունում։
Հաղորդագրությունում նշվում է նաև, որ հրադադարի ռեժիմի խախտման պատճառով աշխատանքները դադարեցվել են։ Ըստ աղբյուրի վնասվել է տրակտորի անվաթևը և անվասկավառակը, իսկ քաղաքացիական անձանց շրջանում տուժածներ չկան։
ԱՀ ՆԳՆ ոստիկանության փոխանցմամբ՝ ստուգմամբ զբաղվում է ոստիկանության Մարտունու շրջանային բաժինը։
Նյութեր են նախապատրաստվում ռուսական խաղաղապահ զորակազմին ներկայացնելու համար։
