Երեւանում այսօր մեկնարկում է ՀԱՊԿ ԱԳ նախարարների խորհրդի, Պաշտպանության նախարարների խորհրդի եւ Անվտանգության խորհուրդների քարտուղարների հանձնաժողովի համատեղ նիստը, որի ընթացքում կքննարկվեն կազմակերպության պատասխանատվության գոտում առկա ռազմաքաղաքական իրավիճակը, ինչպես նաեւ վաղը կայանալիք ՀԱՊԿ Հավաքական անվտանգության խորհրդի նիստի օրակարգը։
Հանդիպման մասնակիցները քննարկելու են կազմակերպության շրջանակներում արտաքին քաղաքական, ռազմական եւ հակաահաբեկչական համագործակցությանն առնչվող որոշումների փաթեթ։ Ինչպես ավելի վաղ նշել էր ՌԴ ԱԳՆ տեղեկատվության եւ մամուլի դեպարտամենտի փոխտնօրեն Իվան Նեչաեւը, այն ուղղված է լինելու ՀԱՊԿ հավաքական անվտանգության համակարգի ամրապնդմանը եւ հետագա զարգացմանը։
Նիստի արդյունքներով նախատեսվում է ընդունել մի շարք կարեւոր քաղաքական հայտարարություններ, այդ թվում՝ ՀԱՊԿ անդամ երկրների արտաքին գործերի նախարարների հայտարարությունը միջազգային եւ տարածաշրջանային անվտանգության ամրապնդման ու սպառազինությունների վերահսկման, զինաթափման ու չտարածման վերաբերյալ: Բացի այդ, Անվտանգության խորհուրդների քարտուղարները կընդունեն հայտարարություն, որը դատապարտում է նացիզմը, նեոնացիզմը, ծայրահեղականությունը, շովինիզմը եւ այլատյացության բոլոր ձեւերը փառաբանելու փորձերը։ Օրակարգում է «Կենսաբանական անվտանգության վերաբերյալ Հավաքական անվտանգության պայմանագրի կազմակերպության անդամ պետությունների լիազոր մարմինների համակարգող խորհրդի կազմի մասին» ՀԱՊԿ Անվտանգության խորհուրդների քարտուղարների կոմիտեի որոշման ընդունումը։
Ավելի մանրամասն՝ թերթի այսօրվա համարում
