Բեռնատարը Տաթև-Լծեն ավտոճանապարհին դուրս է եկել երթևեկելի գոտուց և կողաշրջվել:
Այսօր՝ դեկտեմբերի 2-ին, խոշոր ավտովթար է տեղի ունեցել Սյունիքի մարզում: Ժամը 11:10-ի սահմաններում Իրանի Իսլամական Հանրապետության քաղաքացի Հասան Տոռաբը իր բարած «Foton» մակնիշի բեռնատարով, դեռևս անհայտ հանգամանքներում, Տաթև-Լծեն ավտոճանապարհին դուրս է եկել երթևեկելի գոտուց և կողաշրջվել:
Ինչպես հայտնում է ֆոտոլրագրող Գագիկ Շամշյանը, վթարի հետևանքով ուղևոր, Իրանի Իսլամական Հանրապետության քաղաքացի Սաբեռ Հասան Վանդին մարմնական վնասվածքներով տեղափոխվել է «Սիսիան» բժշկական կենտրոն:
Օպերատիվորեն ժամանել են ՀՀ ներքին գործերի նախարարության փրկարար ծառայության Աղվանու հենակետի փրկարարները:
Ժամանել են նաև ՀՀ ՆԳՆ ոստիկանության պարեկային ծառայության Սյունիքի մարզի գումարտակի 2-րդ վաշտի պարեկները։ Դեպքի վայր են ժամանել ՀՀ ՆԳՆ ոստիկանության համայնքային ոստիկանության գլխավոր վարչության Սիսիանի բաժնի խումբը:
Վթարի մասին ոստիկանության Սիսիանի բաժնից տեղեկությունը փոխանցել են ՀՀ քննչական կոմիտեի Սյունիքի մարզային քննչական վարչության Սիսիանի քննչական բաժին: Վթարի փաստով Սիսիանի քննչական բաժնում նախաձեռնվել է քրեական վարույթ:
