Ֆրանսիական զարգացման գործակալությունը 100 մլն եվրոյի վարկ կտրամադրի Հայաստանին։ Այս մասին այսօր Կառավարության նիստում նշեց ՀՀ ֆինանսների նախարար Տիգրան Խաչատրյանը, տեղեկացնում է Spuitnik Արմենիան։
Վարկային համաձայնագրի նախագիծը ներկայացնելիս ֆինանսների նախարարը հայտնել է, որ վարկը կտրամադրվի 20 տարով, որից 5-ը` արտոնյալ։
«Այդ գումարը կծառայի ՀՀ 2022թ–ի պետական բյուջեի դեֆիցիտի ֆինանսավորման համար»,-նշել է նախարարը։
Նախարարի խոսքով վարկային համաձայնագրի առանձնահատկությունն այն է, որ դրա նախապատրաստումն ուղեկցվում է մեծ ծավալի տեխնիկական աջակցության աշխատանքներով։
«Տարվա ընթացքում Ֆրանսիական զարգացման գործակալությունը ՀՀ կառավարությանը էական փորձագիտական աջակցություն է ցուցաբերել հատկապես ֆինանսների կառավարման ոլորտում։Հաշվի առնելով Հայաստանի հետ խորացող համագործակցությունը, Ֆրանսիական զարգացման գործակալությունը Երևանում մշտական ներկայացուցչություն հիմնելու որոշում է կայացրել»,-նշեց նախարարը։
ՀՀ վարչապետ Նիկոլ Փաշինյանն էլ նկատեց, որ սա Ֆրանսիայի հետ հարաբերությունների զարգացման ազդակներից մեկն է։
