Նոյեմբերի 23-ին Շվեյցարիայի կառավարությունը հաստատել է Հայաստանին որպես օգնություն 960 հազար շվեյցարական ֆրանկի հատկացումը, որպեսզի աջակցի սահմանամերձ համայնքներին՝ մեղմելու վերջին ռազմական բախումների ազդեցությունը։ Այս մասին ասվում է ՄԱԿ-ի Պարենի համաշխարհային ծրագրի հաղորդագրության մեջ, տեղեկացնում է 1lurer.am-ը:
Մասնավորապես, «Հայաստանի սահմանամերձ համայնքների տոկունություն և տնտեսական վերականգնում – REBCA» ծրագրի շրջանակում, որպես իրականացնող կողմ համագործակցելով ՄԱԿ-ի Պարենի համաշխարհային ծրագրի (WFP) հետ՝ Շվեյցարիայի զարգացման և համագործակցության գործակալության (SDC) միջոցով, Շվեյցարիան անհապաղ մարդասիրական և երկարաժամկետ տնտեսական աջակցություն է ցուցաբերում Գեղարքունիքի, Վայոց ձորի և Սյունիքի մարզերին։
12 ամիս տևողությամբ REBCA մարդասիրական ծրագրի նպատակն է պաշտպանել և վերականգնել Հայաստանի տարածքում սահմանամերձ բնակավայրերում ապրող մարդկանց կացարանները և տնտեսական ռեսուրսներ կտրամադրի ճգնաժամային իրավիճակների նկատմամբ դիմադրողականությունը բարելավելու համար:
Ծրագրի շահառուներն են Վարդենիս (Գեղարքունիք), Սիսիան (Սյունիք) և Ջերմուկ (Վայոց ձոր) խոշորացված համայնքների հակամարտությունից տուժած 15 սահմանամերձ բնակավայրեր, որոնց ավելի քան 1000 տնային տնտեսությունների կարիքներին ուղղակի արձագանքում կլինի։
Հավելենք, որ Շվեյցարիայի կողմից ֆինանսավորվող REBCA ծրագիրը համատեղ մշակվել և իրականացվում է WFP-ի կողմից` Վորլդ Վիժն Հայաստան (WVA) կազմակերպության, Մանկական զարգացման հիմնադրամի (CDF) և Ռազմավարական զարգացման գործակալության (SDA) ներգրավմամբ։
Ծրագրին կաջակցեն նաև ՀՀ աշխատանքի և սոցիալական հարցերի նախարարությունը, ՀՀ տարածքային կառավարման և ենթակառուցվածքների նախարարությունը և ընտրված թիրախային տարածաշրջանների տեղական իշխանությունները:
