ԱՄՆ-ը և Հնդկաստանը նախատեսում են մինչև 2030 թվականը կրկնապատկել իրենց ընդհանուր երկկողմ առևտուրը մինչև 500 միլիարդ դոլար, ասվում է Դոնալդ Թրամփի և Հնդկաստանի վարչապետ Նարենդրա Մոդիի համատեղ հայտարարության մեջ:
Ղեկավարները նաև պայմանավորվել են համատեղ աշխատել Հնդկաստանում ամերիկյան միջուկային ռեակտորներ կառուցելու համար։ Վաշինգտոնը հայտարարել է նաև հնդկական շուկա նավթի և հեղուկացված բնական գազի առաջատար մատակարար դառնալու իր մտադրության մասին։
Դոնալդ Թրամփը հինգշաբթի օրը վստահություն է հայտնել, որ Հնդկաստանը զգալի ծավալներով նավթ և գազ կգնի ԱՄՆ-ից։
«Կարծում եմ՝ մենք մի քանի շատ կարևոր հարցեր ունենք քննարկելու»,- ասել է ամերիկացի առաջնորդը Սպիտակ տանը Հնդկաստանի վարչապետ Նարենդրա Մոդիի հետ հանդիպման սկզբում։
«Առաջին հերթին նրանք մեզնից շատ նավթ ու գազ կգնեն»,- ընդգծել է Թրամփը՝ խոսելով Հնդկաստանի մասին։
«Մենք շատ ավելի շատ նավթ և գազ ունենք, քան աշխարհի ցանկացած այլ երկիր»,- ընդգծել է ամերիկացի առաջնորդը։ «Նրանց դա պետք է, և մենք ունենք»,- հավելել է Թրամփը՝ նկատի ունենալով Հնդկաստանի ածխաջրածինների կարիքները: «Մենք շուտով կհայտարարենք մի քանի շատ մեծ առևտրային գործարքների մասին»,- ասել է ամերիկացի առաջնորդը։
Միացյալ Նահանգները Հնդկաստանի առանցքային առևտրային գործընկերն է։ 2023-24 ֆինանսական տարում երկրների միջև ապրանքաշրջանառությունը կազմել է 118 միլիարդ դոլար: ԱՄՆ-ը Հնդկաստանին նավթի խոշորագույն մատակարարներից է, ինչպես նաև Ռուսաստանը, Սաուդյան Արաբիան, Իրաքը և ԱՄԷ-ն:
«Մենք պայմանավորվեցինք միասին աշխատել՝ օգնելու կառուցել պատմության մեջ ամենամեծ առևտրային ուղիներից մեկը: Այն կիրականացվի Հնդկաստանից մինչև Իսրայել, Իտալիա և ավելի ուշ դեպի ԱՄՆ՝ կապելով մեր գործընկերներին նավահանգիստների, երկաթուղու և սուզանավային մալուխների հետ»,- ասել է Թրամփը համատեղ մամուլի ասուլիսում։
