Թունաքիմիկատների Հայաստան ներմուծման պահանջները կխստացվեն, տեղեկությունը հայտնում է Sputnik Արմենիան՝ հղում անելով ՀՀ սննդամթերքի անվտանգության տեսչական մարմնին (ՍԱՏՄ)։
Աղբյուրի փոխանցմամբ՝ ՍԱՏՄ ղեկավարի տեղակալ Նարեկ Հայրապետյանն այսօր հանդիպել է թունաքիմիկատների գրանցմամբ և ներկրմամբ զբաղվող կազմակերպությունների 30-ից ավելի ներկայացուցիչների հետ:
«ՍԱՏՄ ղեկավարի հրամանով՝ այսուհետ պարտադիր կլինի թունաքիմիկատն արտադրող երկրի և արտադրող կազմակերպության գրանցումը՝ բացառելով նույն ցուցանիշներով, սակայն այլ երկրների և արտադրողների արտադրած թունաքիմիկատների մուտքը երկիր: Ազդող նյութի լաբորատոր ստուգման ընթացակարգը կմնա նույնը»,–ասված է հաղորդագրության մեջ։
Նշվում է նաև, որ այս փոփոխությամբ թունաքիմիկատների գրանցման համար սահմանվել է ժամկետ՝ 26 աշխատանքային օր, որի ընթացքում կկազմակեպվեն գրանցման հայտը ստանալուց մինչև բուն գրանցման ու գրանցման վկայականի հանձնման գործընթացները:
Հավելենք, որ կազմակերպությունների ներկայացուցիչները հանդես են եկել առաջարկություններով։
