Աշխարհի առաջնության 1/8 եզրափակիչի խաղում աշխարհի հնգակի չեմպիոն Բրազիլիան մրցեց Հարավային Կորեայի հետ։ Տիտեի գլխավորած թիմը հաղթեց 4:1 հաշվով, տեղեկացնում է news.am-ը։
Արդեն 7-րդ րոպեին Մադրիդի «Ռեալի» 22-ամյա հարձակվող Վինիսիուս Ժունիորն օգտագործեց Փարիզի ՊՍԺ-ի 30-ամյա հարձակվող Նեյմարի փոխանցումը եւ բացեց խաղի հաշիվը (տեսանյութ)։
13-րդ րոպեին բրազիլացիների առավելությունը կրկնապատկեց Նեյմարը՝ արդյունավետ իրացնելով 11-մետրանոցը, որը վաստակել էր Լոնդոնի «Տոտենհեմի» 25-ամյա հարձակվող Ռիշարլիսոնը (տեսանյութ)։
29-րդ րոպեին Ռիշարլիսոնը խփեց բրազիլացիների երրորդ գոլը։ Նրան գոլային փոխանցում կատարեց թիմի ավագ, Լոնդոնի «Չելսիի» 38-ամյա պաշտպան Տիագո Սիլվան (տեսանյութ)։
36-րդ րոպեին Վինիսիուսի փոխանցումից հետո գոլի հեղինակ դարձավ անգլիական «Վեստ Հեմի» 25-ամյա կիսապաշտպան Լուկաս Պակետան (տեսանյութ)։
76-րդ րոպեին Հարավային Կորեայի հավաքականի գոլը խփեց հարավկորեական «Չոնբուկի» 25-ամյա կիսապաշտպան Պեկ Սին Հոն։
Բրազիլիան քառորդ եզրափակիչում դեկտեմբերի 9-ին կմրցի աշխարհի փոխչեմպիոն Խորվաթիայի հետ, որը պայքարից դուրս է թողել Ճապոնիայի թիմին։
